Espania fue la tierra de oro medieval de oportunidad para los judíos.
Kuando las armadas Islamikas konkistaron kada vez más grandes partes de Europa, los judíos del Medio Oriente bivyendo en los payses del Imperio Romano ke los avia aronjado de sus patria, vieron muevas oportunidades avriendosen para eyos en la Europa musulmana. Una de las mijores oportunidades fue la Espania, empesando kon la konkista musulmana del 711. En realitad, las kozas eran tan buenas para los judíos ayi, ke asta el día de hoy, la mitad del mundo judío se konose komo sefaradí, ke significa "espaniol". (La otra mitad mas tadre se konosera komo Ashkenazi, ke significa "alemán") (1) En la Espania musulmana, los judíos enkontraron una relasyón simbiotica de koekzistensia y kollaborasyon entre eyos y el mundo no judío que los entornava.. A los primos tiempos los musulmanes tuvieron una grande influensa sovre los judíos. Algunos de los mijores eruditos judíos eskrivieron en árabo. Ma la mas grande influensa fue de los judios a los musulmanos. La realidad es, ke el mundo islámiko, espesialmente en Espania, se komporto bastante bien, devido a la grande kantidad de judíos a los kualos se les permitió bivir y de lavorar libremente ayí. El efekto pozitivo de los judíos de la Espania musulmana es otro ekzemplo más del akomplimiento de la profesía en el livro de Bereshit : "Te bendiziré y engrandeseré tu nombre. Serás una bendicho. Y bendiziré a los que te bendigan y maldiziiré a los que no te bendigan". (Bereshit 12: 2-3). Para sitar al gran historiador judío Cecil Roth
Top of Form
La kontribusyon esensial de los judíos, komo judíos, a la vida kultural del mundo medieval y de la Europa medieval en particular, dependíya bázikamente de dos faktores. Estavan instruidos: y eran internasyonales . Sus lavoro komo intermediarios entre los dos mundos kulturales ke eran kuaje inkompatibles [musulmanes y kristianos] fue sin duda la karakterístika funksion judía en la Edad Media: era una funksyon ke realizavan grasias a sua pozisyon y sirkumstensyas spesífikas komo judíos. Es klaro ke esto no les impidió de azer kontribusiones memorables a la sivilizasyón europea komo individuos. (2) Kontribusiones Judias Las kontribusyones judías vinieron en todas las sferas, seygan ekonómikas o intelektuales. Por ekzemplo: • Los judíos se izyeron remarkar komo artesanes habiles. Los judíos eran excelentes profesionales del kuero, metalurjikos, orfevres y joyeros. (Vemos que algunas de estas habilidades sobreviven asta oy. Los judíos yemenitas continúan sus reputasyon komo orfevres y los komersantes de diamantes judíos son famozos en todo el mundo). • Los judíos se distingueron en las sensias, partikularmente en medisina. Los doktores judíos estavan en todas partes, entre los mas famosos estava Maimónides (HaRambam- del kual avlaremos más adelante) y Hasdai Ibn Shaprut, el médiko del siglo X de dos kalifas ke era konsiderado una de las personas más influyentes en Espania. • Los judíos se distinguían en el komersyo. Los judíos eran los intermediaryos entre los mundos musulmán y kristiano, ke en este momento estavan en grande rivalidad y no se komunikavan direktamente entre eyos. Komo resultado, los judíos se konvirtieron en komersantes que kuvrían el Leshano Oriente, Medio Oriente y Europa.
• Los judíos se izyeron remarkar por sus saveduriya : Los musulmanes estavan fascinados por el konosimiento klásiko, ma komo no savían ni el grego ni latín, los judíos vinieron a yenar el vazío, en tradusiendo estas ovras al árabe. Los judíos también ayudaron a difundir la erudisyon árabe y gran parte de la erudisyón klásica del mundo antiguo (gran parte del kual se perdio despues del kolapso del Imperio Romano) a la Europa kristiana en tradusiendo los primeros textos arabes al hebreo, y enbiando estos textos tradusidos a la Europa. , donde otros judíos tradusyeron el hebreo al latín, la lingua del Imperio Romano que todavía era la lingua de la saveduria en la Europa oksidental. Eskritores y filozofos Algunos de los mijores eskritores y filozofos judíos vinieron en este período de tiempo. Tres meresen de ser spesialmente mensiondos : •Abraham Ibn-Ezra, el selebre hombre de sensia, filozofo, astronomo y komentarista bíbliko. • Bachya ibn Pakuda, el famozo moralista autor de “Los doveres del Korason “ (un livro que fue un teksto muy popular en los estudios éticos judíos de la actualidad), ekzamina las obligasyones de la vida interior y prezenta un sistema para evaluar el verdadero kompromiso relijioso. • Yehuda HaLevi,
el famoso autor del “ Kuzari “, una novela filozofica bazada en la historia del rey de Khazar, un reyno situado entre el Mar Negro y el Mar Caspio. (En el siglo VIII el rey de Khazaria, indecizo si el devría afiliarse a los kristianos o musulmanes, los grandes eruditos diskutieron sovre los méritos de las relijiones del mundo, y komo resultado de este debate se konvirtió al judaísmo komo finalmente lo izo una buena parte de su país, la historia de Khazaria terminó en el siglo 11 kuando fue destruida por una koalisyon bizantina / rusa.) Bazándose en esta historia probablemente verdadera, Yehuda HaLevi rekreo imajinativamente el debate delantre del rey en su novela, ke sigye siendo popular asta este día.
El paradíso judío en Espania terminó kuando una kruel dinastía musulmana berbera - Almohades - yego al poder en el siglo XII. Kuando los Almohades tomaron el sud de la Espania, dieron a los judíos tres opsiones: konvertirsen al Islam, irsen de la Espania o morir. De los muchos judíos ke fuyeron de Espania en este momento no era otro ke el famozo Maimónides (konosido komo haRambam, el akrónimo de su nombre kompleto, el rabino Moshe ben Maimon, Moshe el ijo de Maimón). (Se ve ke es posible ke muchos de los judíos famozos eran konosidos por sus akrónimos. Esto se deve a ke los judíos asta este momento no tenían alkunyas (apellidos de famiya). Mientras ke los judíos sefaradím empesaron a tomar los apellidos aze más de 500 anyos, la mayoría de los judíos eshkenazim no uzo tener apellidos asta ke las autoridades kristianas lo forsaron verso la fin del siglo XVIII y empesijo del siglo 19. Los judíos eran tradisyonalmente konosidos por sus nombres y los nombres de sus padres, a vezes por sus nombres tribales, como Cohen o Levi, o los lugares de su orijen ( komo Toledano de Toledo en Espania), y aparte de esto, era más fásil akortar tantas palavras en un akronimo). Maimonides- HaRambam Maimónides nasyo Moshe ben Maimon la la entrada de Pesah en 1135 en Córdova, Espanya, a una prominente famiya rabínika. En su arvole de famiya figuravan el rey David y el rabino Yehuda HaNassi, que havían kompozado la Mishná . Su maestro principal fue su padre, el rabino Maimon ben Yosef, un juzgo judío, que le ensenyo no solo el Talmud, sino también los fundamientos de las matemátikas, la astronomía y la filozofía. Maimonides tenía solo 13 anyos kuando su familia se vido ovligada a abandonar Espania. Después de bivir komo vagabonde durante muchos anyos - durante los kuales murio su padre - Moshe ( Maimónides) y su hermano David finalmente se establesyeron en Fustat, serkaa de El Cairo, en Egipto. Ayi Maimónides kontinuo sus estudios de la Torá, mientras que su hermano David, un komerciante de piedras presyozas, apoyó a la famiya. Kuando David murio en un viaje por mar en 1166, la karga kayo en Moshe. Maimónides no keria ganar dinero kon su konosimiento de la Tora, y para ganarse la vida, se konvirtyo en un médiko ke empeso su estudio de medicina anyos antes , de kuando bivía en Fez. En poko tiempo, fue tan famozo ke fue nombrado médiko del Tribunal del Sultán Salahaddin en El Cairo. También fue nombrado el prinsipal rabino de El Cairo. Aparte de ser un famoso médiko y sanador, HaRambam-Maimónides fue un eskritor prolífiko. De sus ovras voluminozas, la mayoría de las kualas fueron kompuestas en árabe ma eskritas kon karakteres hebreos, kuatro son konosidas komo probablemente las mas famozas.
Komentario sovre la Mishná - su explikasión de la Mishná • Mishneh Torah - Su mayor lavoro - Un kompendio monumental ke kuvre toda la Ley Oral y la Alacha (también se lo konose como Yad Hazaka) • More Nevohim (Guía para los perpleksos): escrito en arabe. Este tratado filozófiko diskute el pensamiento judío tradisyonal en komparasyon kon la filosofía grega klasika, y se konsidera la ovra filozofika la más grande produsida por un judío. • Discurso sovre el mundo venidero: su explikasyón de la era mesyanika ke inkluye los 13 principios de la fey (este diskurso esta kontenido en su introduksyon al Tratado Sanhedrín 10: 1) (Para traduksyones de ekstraktos importantes de las ovras fundamentales de Maimónides, ver el The Essential Maimonides, de Avraham Yaakov Finkel). Durante su tiempo, algunos de los eskritos de Maimonides demostraron ser muy kontroversidos. Algunas de sus deklarasyones fueron konsideradas demaziado radikales, otras simplemente fueron malentendidas. En un momento, sus ovras fueron defendidas, y despues de su muerte en 1204, kemadas por deskontentes y la provokasyon de los rabinos. Kuando mueve anyos más tadre, el rey de Fransia Luis IX ordeno kemar el Talmud, los judíos lo interpretaron komo un kastigo de de parte del Dio por lo ke eskrivyo HaRambam y izo para kemar sus ovras. En realidad, el rabino que provoko la prohibisyn y la kema, fue el rabino Yona Gerondi, mas despues se arrepintyó por azerlo , y escrivió el livro Sha'arei Teshuva, "Puertas del arrepentimiento", como una forma de rogar de ser perdonado. Oy las ovras de HaRambam son universalmente akseptadas y respektadas. Es un fakto ke Maimónides es konosido en el mundo judío komo uno de los mas importantes de los “Rishonim - los Primeros". El grupo de savyos judíos ke vinieron antes: los Tanaim o "Maestros" (200 a. C. a 100 EC) ke son mensionados en la Mishná; los Amoraim o "Explicadores" (200 a 500), mensionados en la Guemará; y los Gaonim o "Genios" (500 a 1038) que fueron los maestros de las akademias Babilonikas post-Talmúdikas. Los Rishonim (1038 a 1440) kontribueron signifikativamente a la erudisyón judía. Además de Maimónides, uno de los más famosos de los Rishonim fue el rabino franséz Salomón ben Isaac (Shlomo ben Yitshak), konosido en todo el mundo por su akrónimo, Rashi.
Rashi Aki se puede azer una demanda: Kual fue el destino de los judíos en Fransia? En primer lugar, algunos judíos se establesieron en este pays kaje 1.000 anyos antes, kuando el Imperio Romano estuvo aronjando a los judios. Ma durante mucho tiempo los judíos bivyeron en chikas lokalidades. La expansión vino a través de algunos evenimientes interesantes del destino. La tradisyon judía dize que en el siglo VIII, Charles V, el rey de los frankos, viendo komo los judíos fueron útiles para los musulmanes, le demando al califa (halife) ke le enbiara algunos rabinos, saviendo ke una vez que tuviera rabinos, más judíos viendrian detrás de eyos. Ademas, los judíos eran frekuentemente sekuestrados, fuyidos por pirates ke savían que sus kompanyereros judíos pagarían jenerosamente para salvarlos. Ekziste la leyenda de los kuatro kaptivos, ke eran rabinos de la komunidad babilonika, kada uno de los kuales fue salvado por una komunidad judía diferente ke pagava a los pirates. Según la leyenda, un chiko grupo de judíos fransezes trusheron una grande kantidad de dinero para salvar al rabino Nosson HaBavli, kon la kondisyon de ke viniera y empesava una yeshiva en su comunidad en Fransia, lo kual el izo. (3) Rashi, el más famozo de los rabinos fransezes, nasyo Shlomo ben Yitshak o Solomon Ben Isaac en 1040 en Francia, aunke fue enbiado a estudiar en una yeshiva en Alemania. Después de kompletar sus estudios, Rashi bolto a Fransia y se instaló en su sivdad natal de Troyes. Al igual que Maimónides, el refuzo de ganar dinero kon su konosimiento de la Torá, ganándose la vida de las vinyas ke el possedava. Rashi tenía un konosimiento absolutamente ensiklopédiko de la Ley Oral y Escrita. Él se enkargó de responder a algunas de las kestiones las más evidentes que aparesen en meldando el texto del Tanakh (los 24 libros de la Biblia hebrea). Es por esto ke oy tantas edisiones de la Torá incluyen sus explicasyones juntos kon el texto (perush Rashi). Otra koza que Rashi izo fue escrivir un komentario sovre todo el Talmud Bavli (de Babilonia). Oy, este komentario aparese alyentro de práktikamente todas las pájinas del Talmud. Se konsidera que sus explikasyones son indispensables, porke en aleshandomos kada vez más del Monte de Sinaí, se aze más y más difícil se entender las nuensias de la ley judía.
1) Mientras ke el término sefardí se uza munchas vezes para kategorizar a todos los judíos que vinieron del mundo de Oriente Medio / musulmán, el término no es realmente exacto. Munchas de estas comunidades tienen poka o ninguna koneksion histórika con los judíos de Espania, kere dizir, los judíos persas, los judíos yemenitas, etc. El término el mas preciso sería Edot HaMizrach o "comunidades de Oriente", ke inkluye todas las komunidades judías no eshkenazías. 2) Dagobert D. Runes ed., El impacto hebreo en la civilización. (Nueva York, 1951), pp. 349-356. 3) Se pensa kue la historia es una leyenda y ke el verdadero kreador de la primera Yeshiva en Fransia probablemente fue Rabbeinu Gershom Me'or HaGaolah (965-1040). Si bien esta historia real puede no ser fidel a los faktos, rmostra la kruda realidad del secuestro y la salvasyon en pagando a los sekuestrantes, ke fue una karacterística triste de la vida judía durante este período