Lo konta Yoram Tahar Lev, poeta-lyricista Israeli bien konosido :
En el parlamento Inglez, Churchill, primer ministro, esta avlando. Una miembra de la oppzisyon no esta de akordo kon Churchill, le echa un grito : “ Parese ke bevites muncho anoche, estas borracho”. Churchill no uzava kedar kayado,le dize “Sinyora la deputada, si yo esto borracho oy mañana me va pasar y tu sos mujer feya i vas a kedar amanyana mujer feya ”,
Ma la deputada también era de akeyas ke no se kedan kayadas, le dize: “ Bueno ke no so tu mujer. Si era tu mujer, uvyera metido tosigo en tu fincan de te ” Churchill le da imediatamente la repuesta, en dizyendo “Sinyora, si tu eras mi mujer preferaria bever el tosigo kon el te ”
En vezes mos eniervamos y estamos muy deskontentes de ver ke siempre los Judios no están de akordo uno kon el otro. En la Kneset siempre ay gritos/ Esto es una realidad desde 3500 anyos. Ansi es ke dizen :”Dos Judios, tres kehilot ¡! Kada uno se va a otra kehila y una tresera para irse kuando se peleya en la suya ¡”
Kontan ke viene Rabino muevo a la sinagoga del kazal ondea via munchos Judios. El Rav mira ke en la tefila, kuando viene la orasyon “Shema Israel” la metad de los miembros dize la Shama asentados, la otra metad en pies. El ke esta en pies grita al vizino asentado para ke se alevante.
Esto no le plaze del todo, el desida de traer una regla para ke todos o estén en pyes ,o ke estén todos asentados el dizyendo la “Shema”. Ma antes de desidir, va a konsultar kon el Judio el mas aedado del kazal, Ham Moshe, ombre de 95 anyos.
Le dize : Ham Moshe, kualo es esto? La meta enpies la meta asentado.El ke se alevanto empesa a gritar al ke kedo asentado. Estamos en el kahal, y no esta bueno. Dime tu komo se deve azer. Ham Moshe le responde : “ Kvod aRav, en pies no es minhag (tradisyon)”. “Entonses ke estén asentados” . Ham Moshe le responde: “Ni asentado dizir la Shema no es tradisyon!!”.”
El Rav no saviendo kualo azer, le dize : “Ham Moshe, kale ke me ayudes a azer seder: asentados o en pies i ke uno no e diga a otro asenta o alevanta!”. Ham Moshe le dize : “La meta en pyes i la meta asentados, i uno azerle la remarka al otro, esta es la tradisyon ¡!!”
El primer desakordo ke salyo entre Judios fue kuando 3500 antes, kuando Korah se revolto contra la autoridad de Moshe Rabenu, y al final fue Korah y sus adherentes fueron kastigados, la tierra se los englutio y desparesyeron. De akel tiempo los Judios rogan todos a Dio según la ley de Moshe, ma siempre están en desakordo uno kon el otro, uno se kere englutir al otro.
Ansi es en la Historia Judia : Rehavam contra Yerovam, Israel contra Yehuda, Hasidim kontra Mitnagdim, Kanaim kontra rabanim, Judios contra los Hellenizantes, relijiozos kontra los laikes, Haredim kontra Reformistas, Mapai kontra Herut, Avoda kontra Likud, y las famozas diferensias entre Bet Hillel y Bet Shamai :
Malgrado todo esto, Am Yisrael Hay ¡!!!.
Traduksion de : Selim AMADO Nov.2017