La sinyora Klara Perahya, ke toda su vida logro por la lingua Judeo-Espaniola, la investigo y partisipo a todos los evenimientos konsernando esta lingua, en Turkiya komo en las platformas internasionalas, murio el dia de 14 de Septiembre 2017 y mos desho la vida.
Klara Perahya era una de las figuras las mas intellektualas del Judaismo de Turkiya. Asta pokos dias antes de su disparisyon eya fue, durante munchos anyos, la editora de la pajina en Judeo-Espaniol del “Shalom” ke aparese en Istanbul.
Nasio en el kartier Yel degirmeni de Kadikoy en Istanbul en el anyo 1920, Klara Prahya fue una kontribudora importante del livro “Erensia Sefaradi” y preparo un diksionario muy ‘nformat’vo Judeo-Espaniol / Turko.
No solo en el kampo de la preservasion de la lingua Judeo-Espaniola, Klara Perahya fue aktiva en las ovras sosyalas de la komunidad, komo en la ovra “Matan Beseter”, en lavorando por eya konmuncha ardor y dedikasyon. El ayudo a los ke lo nesesitan, el resolver sus difikultades fueron siempre sus objektivos los mas importantes.
Klara y su defonto espozo Eli Perahya eran siempre invitados komo avlantes a los simpozios y kongresos sovre el Ladino/Judeo-Espanyol , ke tenian lugar afuera de la Turkiya. Kon su lingua dulse, eya siempre perkurava de konvenser i enkorajar a eskrivir en esta lingua.
La despedida de Klara Perahya tendra lugar el Alhad 17 Septiembre en el sementerio ( Beit aHayim) Judio de Acibadem, a las oras 11 de la manyana. Eya repozara en pas al lado de su defonto marido kerido Eli Perahya, kon el kual bivyo munchos anyos, i ke fue un miembro muy apresyado de la Komunidad Judia de Turkiya.