SEKERE RESEFTA
Djoha avia topado empyego en una farmasia. En la primera noche ke estava de guardya, deves en kuando viniya djente i por lo mas era solo. En supito la puerta fue forsada kon dadas de pye i ke ve un ombre grande yevando una maska i tenyendo un plomo en la mano, el kual le echa un grito: “presto vazya en esta bolsa todo el dinero ke ay en la kasha.” Djoha mareado mira al ladron i al plomo ke le apunta sovre su kavesa i le responde kon sangre fria : “Sinyor ke me pardone, no damos nada de aki sin resefta!!”
ESTA EN VIDA
Djoha azia poko tiempo ke avia vinido a Estambol i kon muncha alegria avia renkontrado su amigo Zvulun kon el kual estavan en la mizma klasa de la Aliansa en Kavala. Un dia de martes se van a la meana de Hristo, el grego de Kumkapi i se meten a bever vino de la izla Bozcaada muy famoso. Komo meze se merkan fustukes i leblebis i beven apoko apoko i avlan entre eyos. Despues de la sinkena kupa Zvulun, medyo tinta le dize a Djoha:” Saves una koza, mi mujer Rashel es un anjelo, un verdadero anjelo.” Esto ke oye Djoha se aboka i toma su kavase en sus dos manos i le responde:”Malorozamente karo amigo te dire ke la miya dainda esta en vida!”
ANDE AY ESTE MAZAL
Djoha i Merkada kada nada nada se van peleyando i Merkada kon gritos una vaz le dize: “ Djoha ke lo sepas ke después de todo lo bueno ke ago por ti tu deves de yevarme en tus ombros.” Djoha ke oyo estos biervos toma un grande reflo i en murmureando dize” Espero ke el D. me va ayegar a ver a kel dia inshalla!!!”
SEKSO
El patron de la kaza ke Djoha el soltero, keria alkilar le dize:” Sinyor Djoha aki no se permete del todo de trayer mujeres!” En riva de esto Djoha le pregunta:”Ombres poden vinir?” “Bien entedido” le responde el patron. Djoha toma un reflo i le dize :” Te dizere ke mi buto es de alkilar este apartamento para mi namorada.”
DJOHA KONSEJERO
En Yaffo un mansevo seva a demandar consejo a Djoha renomado por su saverisyo. El mansevo le dize “ Sinyor Djoha kero ke me digas tu sentimiento porke me kero kazar, i tengo 2 namoradas kon la kuala ke me tome?” Djoha le responde “ Echa en basho ken son estas chikas?” El mansevo ampesa a kontarle i le dize:”Una viene de famiya muy rika, los parientes son rikinyones, ma en edad es mas grande demi i demazyadamente feya, la otra es chika apenas si tiene 18 anyos, muy luzya kon ojos mavi, ma es desbragada i los parientes son proves. Ke dizes? Djoha toma un ayre pensativle i seryozo i le responde: “ Yo te digo ke te kazes kon la ermoza, ma a la okazyon mándame el numero de telefon de la feya si pode ser!!”
Selim Salti --2021--
Comments